මාතලේ ළිඳක දෙදෙනෙකු මියයයි. බේරගන්න ගිය අයත් නසී

මාතලේ - මහවෙල - අකුරන්බඩ ප‍්‍රදේශයේ ළිඳක් තුළ සිහිසුන්වුණු පුද්ගලයා සහ ඔහු මුදාගැනීමට ගිය තවත් අයෙකු ජීවිතක්ෂයට පත්වී ඇති බව පොලීසිය ප‍්‍රකාශ කළා. අද පෙරවරු 11 ට පමණ අදාළ ළිඳට වැටුණු පනිට්ටුවක් ගොඩ ගැනීමට ගිය  30 හැවිරිදි පුද්ගලයෙකු එය තුළ සිහිසුන් වුණා. පසුව ඔහු මුදාගැනීමට තවත් දෙදෙනෙකු ළිඳට බැස ඇති අතර ඔවුන්ටද හුස්ම ගැනීමේ අපහසුතා මතුවී සිහි නැතිවී තිබෙනවා. පසුව අවට සිටි පිරිස මෙම පුද්ගලයන් තුන්දෙනා මාදිපොල රෝහලට ඇතුළත් කළා. එම අවස්ථාව වනවිට පළමුව සිහිසුන්වූ 30 හැවිරිදි පුද්ගලයා සහ ඔහු මුදාගැනීමට ගිය දෙදෙනාගෙන් එක් අයෙකු වන 45 හැවිරිදි පුද්ගලයෙකුද ජීවිතක්ෂයට පත්ව සිටියා. පොලිස් මාධ්‍ය ප‍්‍රකාශක කාර්යාලය සඳහන් කළේ ඔවුන් අකුරම්බඩ - ගල්ලන්ද ප‍්‍රදේශයේ පදිංචිකරුවන් බවයි.